У зняволенні ў Сяргея Ціханоўскага ішла кроў з рота і носа, выпадалі і крышыліся зубы, а яшчэ з’явіліся чырвоныя плямы на скуры. Цяпер ён праходзіць абследаванні і прымае мноства прэпаратаў. Пра гэта былы палітвязень расказаў у інтэрв'ю праекту «жыццё-маліна» Мікіты Мелказёрава.
Ціханоўскі сказаў, што толькі пачаў абследаванні, але лячэння яшчэ не было. Напрыклад, у яго ёсць праблемы з зубамі. На пытанне, колькі засталося сваіх зубоў, былы палітвязень адказаў, што «некалькі сваіх». Нейкія зубы давядзецца вырываць, бо «нічога жывога няма», будуць ставіць пратэзы, прывёў ён вердыкт стаматолага.
Паводле Ціханоўскага, у зняволенні ў яго аднойчы на Новы год вываліліся зубы — адваліўся пярэдні мост (некалькі штучных зубоў на металічным каркасе, якія мацуюцца на апорныя зубы ці каронкі). Пры гэтым усё гэтак жа трэба было рэгулярна называць свае імя і прозвішча сілавікам, што прыходзілі пастаянна.
«Я хадзіў, у насоўцы трымаў гэтыя зубы. Два тыдні мяне не пускалі тады да стаматолага — у Новы год і яшчэ дзён 10 пасля Новага года. А ты мусіш рабіць даклады пастаянна гэтыя, калі прыходзяць праверкі, ператрусы, усё астатняе. І калі ў цябе такое вымаўленне — гэта страшнае такое прыніжэнне», — расказаў Ціханоўскі.
Аднак у выніку да стаматолага яго звадзілі. Праўда, нават цяпер зубы могуць выпасці, асцерагаецца Ціханоўскі.
Нядаўна за кратамі ў яго выпала пломба і раскалоліся два зубы. Як мяркуе экс-палітвязень — праз харчаванне. Тады ён даведаўся, што з жодзінскай турмы звольніўся стаматолаг — яму сказалі, што гэтага доктара «ўжо ніколі не будзе».
Акрамя таго, у Ціханоўскага дагэтуль засталіся чырвоныя плямы на скуры, якія з’явіліся яшчэ ў зняволенні. Турэмныя медыкі яму казалі, што гэта алергія, давалі таблеткі. Аднойчы ад лекаў цела цалкам пачырванела і засбярбела. Пасля гэтага пачалі рабіць ўколы. Але што калолі — не казалі.
Са словаў Ціханоўскага, у яго «кроў пастаянна ішла з рота, з носа» праз запаленні слізістай, і таму КДБ палічыў, што ў яго «нейкая нездаровая сітуацыя са здароўем». Акрамя таго, пастаянна падала вага. У пачатку года сілавікі абяцалі адправіць палітвязня на абследаванне, але не зрабілі гэтага, толькі пачалі ўзмоцнена карміць перад вызваленнем.
Выйшаўшы на волю, Сяргей важыў 79 кг, потым вага знізілася да 76 кг, а потым пачала расці.
«Па аналізах крыві ў цэлым усё нармальна, ёсць па некаторых напрамках праблемы. Але што [асабліва] жахнула чамусьці дактароў — што вітамін D проста наогул адсутнічае», — расказаў Ціханоўскі.
Паводле яго, цяпер ён мусіць піць «19 таблетак кожны дзень». На момант інтэрв'ю было пройдзена каля паловы абследаванняў.
Нагадаем, Сяргея Ціханоўскага вызвалілі 21 чэрвеня пасля больш чым пяці гадоў зняволення. Гэта адбылося пасля сустрэчы Аляксандра Лукашэнкі са спецпасланнікам Дональда Трампа Кітам Келагам.
Экс-палітвязень сцвярджае, што ў зняволенні яму ўводзілі нейкія прэпараты, назваў якіх яму не агучвалі. Пры гэтым ён падкрэсліў, што, пакуль сядзеў турме, у яго «ніякіх смяротных захворванняў не было». Пасля вызвалення ён адзначаў, што ў яго зніжаецца вага.