Экс-міністр транспарту Расіі Раман Старавойт застрэліўся ў Адзінцове (Маскоўская вобласць РФ). Пра гэта паведамілі набліжаныя да сілавікоў тэлеграм-каналы SHOT і 112.
Раман Старавойт 7 ліпеня быў адпраўлены ў адстаўку з пасады міністра. Яго месца часова заняў былы губернатар Ноўгарадскай вобласці Андрэй Нікіцін. Такое рашэнне прыняў прэзідэнт РФ Уладзімір Пуцін.
Паводле інфармацыі крыніцы 112, на Рамана Старавойта «даў паказанні былы губернатар Курскай вобласці Аляксей Смірноў, затрыманы нядаўна за крадзяжы падчас узвядзення фартыфікацыйных збудаванняў у рэгіёне». Пасля гэтага Старавойта звольнілі, і ён звёў рахункі з жыццём у сваім доме ў Падмаскоўі, піша 112.
Інфармацыю пра смерць Рамана Старавойта пацвердзіў у гутарцы з RTVI кіраўнік камітэта Дзярждумы па абароне Андрэй Картаполаў. Ён заявіў, што гэта адбылося «дастаткова даўно».
У Следчым камітэце Расіі паведамілі, што супрацоўнікі ведамства высвятляюць абставіны смерці Рамана Старавойта.
«Сёння ў Адзінцоўскай гарадской акрузе ў асабістым аўтамабілі знойдзенае цела былога міністра транспарту Расійскай Федэрацыі Рамана Уладзіміравіча Старавойта з агнястрэльным раненнем. Следчыя органы ГСУ СК Расіі па Маскоўскай вобласці працуюць на месцы, высвятляюцца абставіны здарэння. Асноўная версія — самагубства», — адзначылі ў СКР.
Раман Старавойт таксама раней узначальваў Курскую вобласць, Смірноў заняў галоўную пасаду ў рэгіёне пасля яго.
У чэрвені 2022 года Раман Старавойт, які ў той час кіраваў Курскай вобласцю, сустракаўся ў Мінску з Аляксандрам Лукашэнкам. Бакі абмеркавалі пытанні імпартазамяшчэння, прамысловай кааперацыі, гандлёвага супрацоўніцтва.